رمضان كريم.. اشطه.. قشدة

رمضان كريم.. اشطه.. قشدة

كل سنة وحضراتكم بخير وصحة وسعادة.. انهاردة أول رمضان.. يعني أول يوم صيام.. يعني ولا قهوة ولاسجاير.. ولاشيشة كمان.. ولافطار الصبح ولمه العيلة أو الاصحاب الصبح حولين شوية فول مدمس بزيت وليمون وطعمية سخنة وحزمتين جرجير.. وقرن فلفل حراق.. وله شوية بيض بالبسطرمة وجبنه رومي وشوية زيتون وخيار مخلل.. أو ساليزون وبتون سالية ومج نسكافية.. أو لقمة ناشفة مع حتته جبنه قريش وحادق.. أو سميطة سخنة من الفرن ومعاها حتته جبنة نيستو أو حاف.. أو بوب كورن وكانز.. شيكولاته وسبرايت دايت

الصبح والدنيا بتشرق بأول يوم رمضان كأنها يتحظرك عن حاجات كتير أوي بنعملها من غير ما ناخد بالنا.. بتقولك مش ضروري تبص على البنات اللي رايحين المدرسة.. أو بلاش تتخانق مع اللي جمبك في زحمة المترو.. وابتسم في وشه وقوله كل سنة وانت طيب.. يروح ضاحك ويقولك وانت بالصحة والسلامة.. مصر هي عالم مستقل بذاته كل حاجة فيه غريبة.. ومختلفة بس حلوة

ايوة مصر حلوة.. لانها وطنا.. و ـ ط ـ ن.. أول مرة كنت أحس بمعني الكلمة دي يوم ما كنت بغطي أحداث فتح معبر رفح الحدودي مع قطاع غزة وواحد فلسطيني سبلي الدين عشان صورته بالرغم من اني قولت له بهدوء لو مش عايز الصورة امسحها.. لاقيته سب لي الدين ساعتها الدم غلي في عروقي وقولت له انت جاى بلدي عشان تشتمني.. وفي ساعتها الناس هاجت عليه وهدوا الموضوع

مصر حلوة بشوارعها بليل.. بجوها في الشتا.. بحرها في الصيف.. بنيلها الملوث.. بالبحر والجلاليب والمايوهات في بورتو.. بشرم وكفر الشيخ.. بحاجات كتير.. كنت مسافر من حوالي اسبوعين وشايل شنطة سفر مش كبيرة على قلبي وعلى كتفي شنطة أصغر وفي يدي الاخرى شنطة وسطانية.. لان مراتي كانت معايا ولاسباب فنية (حامل) لا تستطيع أى حمل آخر.. وكنت متوجها إلى نقطة الانطلاق للسفر.. واثناء صعودنا ميني باص مملوك للشركة اللبنانية على ما أظن.. الاخضر دة أبو جنية وربع لقيت السواق بيقولي هتدفع تذكرة على الشنطة.. تشاجرت معه ولم أكن انا الوحيد.. كان معي 26 راكبا يدافعون عن الحق.. لم أجد هذه الروح منذ أمّد حقيقي كنت سعيد بالخناقة التي كانت ترفض الاستغلال وبالطبع رضخ السائق المستغل ولم يتوجه لقسم الشرطة وأثناء الرحلة اكتشف الركاب جميعا أن السائق كان شارب.. المستغل مسطول ولازم حد يفوقه.. هكذا قالها أحد الركاب.. وكل سنة وانتم طيبين