
الحلقة الاولى
انهاردة اول ايام الدراسة ليهم مش ليا انا الدراسة هتبدأ بالنسبة ليا من بكرة.. فكرة فصل الفصل دي لذيذة اوي بس برضة مش حلوة ساعات اصل انا اغلب اصحابي بيروحوا الثلاث ايام التانية وعشان كدة انا هروح لهم كل يوم على باب المدرسة ساعة الفسحة وبستنى عند السور ونخرج كلنا نقعد على القهوة كانه يوم عادي يعني.. بس هتبقى مشكلة اوى لما تحصل خناقة وانا في المدرسة مش معايا اصحابي وله لما يكون في ماتش كورة وهما مش فيه.
هما دلوقتي في الحصة الاولى عندهم الاستاذ وحيد جداول الراجل دة من اول يوم في الدراسة بيقسم جداول الدروس الخصوصية بعد ما بيقدم وصلته المعهودة ان الترم الدراسي قصير واننا لازم نلحق الترم قبل ما يخلص وان بالاجازات الاسبوعية والاعياد الرسمية فاضل مش عارف اد ايه من الدراسة وان الوقت كالسيف والسيف حده حامي وحاجات كدة.. يظبط جدوله ويذنب العيال اللي مبتاخدش معاه دروس ويقعد يحكي على المصيف اللي بيقضية مع اهل مراته في بلطيم نفس المواقف والحواديت كل سنة وكانه فيلم بيتعاد على روتانا.
الصين دي ربنا يكرمها.. الموبايل ابو تلفزيون دة عمل الواجب وزيادة شوية كنت بقعد انا والواد محسن على نفس الدكة في الاخر ونقضيها قنوات الافلام بس هو السنة دي هيروح في ثلاث ايام غيري انا.. عموما مفيش مشكلة بس السنة دي انا خايف اوي مش من الانفلونزا بس.. لكن من ان اصحابي كلهم مش معايا كمان.. احنا اسمنا "مثلث الرعب" محسن بازوكة.. وعلي الرفيع.. محمود مراجيح.. وانا ممدوح سنايبر.. كلنا اصحاب من ايام المدرسة الاعدادي ومفيش حد فينا بيفتن على التاني في اى مقلب يتعمل في المدرسين.
ياه الحصة الاولى خلصت اصلي بعرف من الرنات.. بتاعه العيال.. بس كمان ساعة الفسحة تبدأ وهروح لهم عند السور عشان نكمل جيم البلاى استيشن بتاع امبارح اصلي كنت غالبهم كنت بلعب بالبزوكة وقتلتهم كلهم وخلصت الجيم.. عليهم.
بيقولوا في التليفزيون ان كل واحد يغسل ايده كل ساعتين طب انا امي لما الصابونة بتخلص بعد اسبوع بتصوت.. يعني لو كل واحد فينا غسل ايده كل ساعتين الصابونة هتخلص في يوم.. وكمان اصلا المدرسة مفيهاش حنفيات واستاذ عبد العليم الناظر.. بيقفل المحبس العمومي ومبيفتحهوش غير لما يكون داخل هو الحمام.. وكمان القهوة مفيهاش دورة ميه.. ياعم كبر يعني هى لو ايدي مش نضيفه هموت.
دلوقتي حصة الاستاذة سهام بتاعه الكيميا.. حصتها حلوة زيها.. هى مش كبيرة وكمان مش بتشرح برضه حاجة بس بتقعد تتكلم عن الكيميا وان كان في زمان معامل في المدارس ومدرستنا مفيهاش وكمان بتقعد تقول ان كان بيكون في مسرح والطلبة بيقدموا مسرحيات بس هى متعرفش ان في اكتر من التمثيل بيحصل في الفصول هى دماغها تعبانه شوية واحيانا تزعق فجأة لما الناظر يكون معدي.. هو بيدرس لنا رياضة واحد بس حصته بتبقى هادية ودايما بتبقى القبل الاخيرة وبتكون فرصة كويسة للنوم عشان الواحد يبقى فايق للماتش بتاع المرواح.
يتبع
** تنشر الحلقات بالتزامن مع موقع عشرينيات






