من فضلك اترك رسالة أحنا نائمون

من فضلك اترك رسالة أحنا نائمون

العذاب البدني والاكثر قسوة.. وألما من وجهة نظري هو أن تسمع صوتا بالقرب من اذنيك.. يقول لك "اصحي بقى هو انت هتفضل نايم".. وكأن هذا الشخص الذي فعل ما فعله لا يراعي مطلقا حقوقك البدنية والانسانية في الحق الشرعي وهو النوم

لما الواحد بيكون حران بينام متأخر بسبب الحر حتى لو كنت نايم على البحر.. برضوا هتبقى حران.. ليه لان الدنيا حر اجابة بديهية لسؤال أكثر بديهية.. يا بهية

النوم سلطان.. ورز ولبن مع الملايكة.. ومتعه.. ونمو.. ومفيد للذاكرة والعقل الباطن.. وحاجات كتير.. بس الاول تعالوا قبل ما نغطس في النوم.. أكثر من هذا الحد الذي وصل إلى حالة من السكون التام لشعب كان.. بالتأكيد كان.. وكأنه استغرق في النوم لينمو فقط.. دون أن يحلم بشئ مقنعا.. يغير من مصيره المؤلم.. ومستقبله المبهم.. الحياة تحولت بالنسبة له إلى سبات عميق.. قبل ما نكمل نوم.. تعالوا نبطل فشخرة كذابة بالماضي

ونتفرج على العالم الذي كان يعاني من عصور الاضمحلال.. ليصل إلى أن كل شئ في بيوتنا أصبح مكتوبا عليه صنع في الصين.. صنع في التشيك.. صنع في البرازيل.. و الله دة صنع في امريكا.. ونتفشخر اوي بأنه أمريكاني أو ياباني أو حتى دولة لم نسمع عليها من قبل.. المهم أن جملة صنع في مصر تلاشت من ذاكرة الصناعة.. ومن ذاكرة التاريخ الذي سيدرس لابنائنا

في الماضي كانت مصر دولة زراعية.. ثم تحولت إلى صناعية ثم تحولت إلى دولة تستورد كل ما يزرعة وينتجه ويصنعه الاخرون.. غطسنا في النوم ولم ولن يزعجنا أحد.. بكلماته الرقيقة أوي "أصحي بقى.. هو انت هتفضل نايم"

الو مصر موجودة لو سمحت.. تثأب ورد بصوت محشرجا.. لا دي نايمة شوية.. والشوية بتزيد.. والعالم فايق أوي وبيخترع وطلع القمر وكأنه رايح العتبة يشتري راديو ترانزيستور صيني برضه.. واتفتحت المحلات اشكال والوان عشان نبيع اللي عمله الناس التانية.. أصل احنا نايمين.. اترك رسالتك القصيرة بعد سماع الصفارة.. (نرجو أن تكون الرسالة قصيرة لكي لا ترهقنا في سماعها)

كم مرة فكرنا نصحي عشان نقعد في مكان ونفكر مجرد التفكير بس يمكن يوصلنا لنتيجة للكارثة اللي بنعاني منها.. بنشتغل وبنجري ورا المواصلات الصبح بدري.. وبنزوغ برضه بدري عشان طابور العيش.. وقبل ما المواصلات ما تنزحم.. وقبل ما الناس متروح قبلنا وتبدأ النوم بدري عننا.. بالرغم أن الناحية التانية من العالم (اللي هما صاحيين) بيرفضوا أنهم ياخدوا أجازة مش يزوغوا.. طب تعالوا نجرب كدة نصحي نتفرج على الدنيا التطور المذهل في الصناعة والانتاج الزراعي والحيواني.. وصلت بنا الكارثة إلى أننا استوردنا لحوم من الهند والبرازيل.. ولبن من الدنمارك.. وسمك من فيتنام.. بالرغم من وجود بحرين عندنا

الامارات صحيت بدري شوية وبدأت تبني بلدها من جديد.. بدأت تعمل مهرجانات للسياحة عندها بالرغم من أنهم معندهمش ثلث أثار العالم.. عندنا كنوز مش موجودة.. طبعا غير نعمة النوم.. الاستغراق في النوم.. أصبح سلوك راقي للمواطن في هذا البلد

طب هي نص ساعة بس.. اريح جتتي.. ونصحي نعمل كل اللي بتقول عليه.. واللي صاحي هيرد ويقولي يعني هو انا هغير العالم لوحدي.. والنوع اللي صاحي بدري شوية ياعم دة الناس بره عملت حاجات عشان نوصلها ادامنا 100 سنة.. ونوع تاني مش هيدخل عندي لانه هيحس اني قليل الادب وتطاولت عليه.. بموضوع النوم دة.. شكرا للي صحي وقرأ