هحط قفل كبير على الباب من بره واجيب عيل صغير يقفله بعد ما ادخل الشقة.. وترباس عريض من جوة ازوقه بكل قوتي.. وكالون 600 تكه.. الا صحيح التكه دي تعبر عن ايه في وحدات القياس.. اقولكم انا التكه الواحدة تعبر عن وحدة واحد لسان ترباس.. ولسان الترباس لا يتعدى في الغالب الخمسة سنتيمتر.. يعني كانك وقفت ادام حد وعايز تغيظه حاجة من الاتنين يا تعمل تكه.. يعني تطلعله لسانك
تكه.. ايه لعب العيال دة.. لا دة مش لعب عيال دة حقيقي انا عايز اطلع له لساني واقوله لمؤخذة فيك.. طوز.. هو مين دة.. الراجل صاحب البيت ياسيدي انا اللي اتصلت بيه والله عشان اوديله الايجار تاني يوم في الشهر عشان الراجل ياخد حقه وكمان عشان الفلوس متنصرفش.. قال ايه عايزيني ادفع وماخدش ايجار هاهاى.. دمه خفيف.. قال ادفع من غير وصل إيجار
تكه.. لقيته بيتصل بيا وبيقولي تعال خد الوصل وادفع الايجار.. روحت ادفع اتاريه كان بيشتغلني بالرغم من ان سنه لا يقل عن 75 سنة وعايز يشتغلني اللي ناقص انه ينزل معايا جنينة مول عشان نظبط بنات.. هاهاى
تكه.. مرديتش ادفع الايجار طالما مفيش وصل ويبقى يخبط.. دماغ حضرته في اقرب جدار هو له فلوس عندي.. والشقة في حيازتي.. هى اه مش منقول بس انا شردت له في المنطقة انه مش راضي يديني وصل ايجار
تكه.. هو انا فعلا واثق فيه بس افرضوا كدة معايا اني روحت دفعت الايجار ووانا نازل من عنده لقيت السيد عزرائيل طالع يقبض روحه يبقى ايه اللي يضمنلي انه اخد الايجار شهود العيان وله شهود الرؤية.. وله السيد عزرائيل اللي شافني وانا نازل من على السلم.. هاهاى
تكه.. بلاش دي يا سيدي انا ايه اللي يعيشني مقلق بسبب الايجار مهو طالما الموضوع ثقه بقى نخليها.. من غير ايجار.. يعني انا مدفعش ايجار شهر هو مش واثق فيا.. هاهاى
تكه.. قلقان والموضوع متعب لاني في حالة الخلاف معاه هضطر اني ادور على شقة تانية بعد ما بيضت دي وكمان أن وديت العفش في الشقة طب أعمل ايه والنبي.. بلاش وصل ايجار وله بلاش ادفع الايجار وله بلاش اعيش في البلد دي بقانونها.. اسئلة كتير رفعت لي ضغطي ومش عارف ليها حل
تكه.. يمكن اكون محبك الموضوع لاني خريج حقوق يمكن لو كنت خريج اى كليه تانية كان اتضحك عليا ومكنتش حسيت بالفرق
تكه .. هركب في الشقة ترباس وعدد لا محدود من الكوالين لكى لايتم اختراق الشقة في حال وجودي.. او غيابي
اقفل.. تك.. تك.. تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك.... تك..
1 comment:
ياسي تكه والنبي كفاية تكتكة هي الناس كدة اتجننت عاوزة تاخد ومتديش، لا والتناحة بقت ايه ماشاء الله عادي يبقى الراجل ملو هدومه ويلف ويدور ومش مكسوف من اللي بيقوله وبيعمله ، وانت عندك حق مفيش حاجة اسمها حسن النوايا في الزمن الاخبر دا ولا تثق في مخلوق ،وإذا كان اللي بيورطك اسمه اخوك منتظر ايه من اللي يتبعوك بس كويس انك واخد بالك الزمن دا عاوز عقل مش قلب ، عاوز عقل يحس بالناس مش قلب الناس شالت القلوب ورسموها بره في كشاكيل المحاضرات ومسيدج على الموبايلات
وسلملي على صاحب البيت
Post a Comment