الاسمنت بنستورده.. ماشي اصل بلدنا مفيهاش تراب.. الفكر اللي بنبي بيه بنستورده.. ماشي مهو معندناش أمخاخ.. لكن القمح نستورده.. دي كارثة.. الكارثة مش انه فاسد بس لا الفساد في الاساس.. اللي وقع العمارة على نفوخ سكانها.. وسكانها غلابه طيابه.. ونقول ربنا سترها مع عبد الستار.. اصله خد العيال وطلع المصيف.. لكن شقى العمر طار.. زي ما طار ابو اردان وبقي ياكل الزبالة.. بعد ما كان بينقي الدودة من الارض.. هي راحت فين الارض.. تحت العمارة.. والعمارة منشور فيها غسيل مغسول زي عقول اللي نشروه
أكل كلاب وقطط وطفحنا.. وطفح بينا الكيل.. واتخرسنا او ما اتهرسنا من عسكري بلدياتنا.. كان معاه شومة سلمتهاله الحكومة.. لكن قمح فيه مش عارف ايه طب اللي استورده استورده ليه مخافش ابنه ياكل منه.. وله معندوش ابن.. دة ابن ستين × ستين.. تصور ان الرقعة الزراعية.. هي فعلا بقت رقعة في ثوبك يا مصر المهلهل.. هدومك مقطعه كشفت عن عورات الفقراء.. وقف هو وعياله ومراته عشان يبيعهم.. طب اللي هيشتري مين.. بيه من البهوات.. وله واحد من اللي قرض.. وله وله
مصر هي صومعه الغلال الاولي في العالم.. كتاب تاريخ مقطع في كيس مخدة خدة الوله من ورا امه ومسح مناخيره بكمه.. عشان يحط فيه كتبه وكراريسه.. وراح المدرسة اتعلم.. متعلمش غير شتيمة وقله قيمه.. داس على قلبه المدرس.. زي ما داس على عقله.. ومعلمهوش حاجة خالص.. وبعدين قاله روح يبن ال.......... شتمه بأمه تصدقوا انه كان المدرس اللي شتمه وهو برضه اللي قتله ومحاه زي ما محى التفكير ليحوله ناس تانية الي تكفير
جزمة مكعوبة.. وشراب مهلهل زي ثوبك يا مصر.. اتسمموا في بطونهم زي ما اتسمموا في عقولهم وبطلوا يخبزوا.. يا فلاحين فين العجين ساعة الصبحية.. كلتوا من العيش الالي.. يا فرحتك يا عمدة يا آلي.. وانت وراك اتنين غفر ماسكين آلي.. في وش بلدياتهم
ام عوضين ومسعده وام الخير.. بطلوا يصحوا بدري.. اصل الفرنه بتفتح وخري.. يصحوا بدري ليه.. والقمح جايلنا ومتظبط سرطان وديدان.. البهايم فهمت عنا ورفضت تاكله.. بس احنا مبنفهمش وافتكرنا ان البهايم بهايم.. هي فين البهايم
No comments:
Post a Comment