تعالو نفكر كدة أيام سيدنا أدم وستنا حواء ونشوف كدة لو مكانوش حبوا بعض.. مهو أكيد هما الاتنين حبوا بعض لان لو مكانش في حب بينهم مكانوش جابوا عيال ويمكن كمان كانوا قتلوا بعض ونقرا اسمائهم في صفحات الحوادث.. مصرع ادم وحواء في ظروف غامضة.. وانتقل إلى مكان الحادث رئيس مباحث الكون ورفع البصمات كل من ومن ومن كما قام السيد فلان والسيد فلان والسيد علان بالبحث الجنائي في ملابسات الحادث الغامض
الحب.. هو شئ جميل نستشعر به تجاه كل شئ يشعرنا بالسعادة والثقة بالنفس.. وكمان هو شعور قوي جدا.. يجعلك تحدي جميع الصعوبات والمشاكل طالما الحبيب إلى جوارك.. لكن الحب لا يقتصر على الرجل والمراة.. ممكن انك تكون بتحب نوع معين من الزهور بيبسطك لما بتشوفه.. وكمان ممكن تكون بتحب مكان لما بتروحه.. أو تكون بتحب ذكرى جميلة.. أو فيلم أو أغنية أو رياضة أو عمل أو كلب أو قطة أو عملك.. المهم أنك تكون بتحب
الصراع.. هو شئ قد يكون جميلا أو غير ذلك وهو الذي يجعلك تعيش في منافسة مستمرة لتصل إلى ما توصل إليه الاخرين.. أو لتحقيق أهدافك ومن الممكن جدا أن يكون صراعك دة مع اى حاجة في الدنيا فقد يكون مع بنت انت بتحبها من طرف واحد وعايز تقنعها بنفسك.. أو ولد تكوني بتحبيه وكرامتك نائحه عليكي ومتقدريش تروحي تقوليله أنك يعني كدة.. أو تكون مع ناموسه هرياك قرص طول الليل في غرفة مظلمة.. لا تسمع منها غير ذنتها.. اه ذنتها.. مهو أصل الصراع دة شئ ذنان كدة تقدر تقول أنه بيؤرق.. حياتك لتصبح أفضل.. وحين تحقق ذلك تحاول جاهدا لتكون أفضل من الأفضل الاولى
الحل أن الصراع لا يتغلب عليك ويسقطك في اطار الخوف والرعب من المستقبل لكن حب صراعك لتتغلب عليه.. وتستطيع أن تحقق حتى ولو قدرا بسيطا من احلامك.. وانت الكسبان لو حققتها كلها.. فالحب والصراع وجهان لعملة واحدة.. زى الملك والكتابة.. في البريزة.. فلا تكون كتابة في قصة لم تكتمل.. بل كن ملكا لحياتك وغير منها ما تشاء بقدر ما تستطع.. لانك لن تعش غير مرة واحدة فقط فاما انت تغير أو تترك مكانك في الحياة لشخص اخر يستحقها
No comments:
Post a Comment