لاسعه في الواسعه

زحمة المواصلات أصبحت حاجة أوف خالص خالص.. وانا راكب عربيتي الكوبية الفضي.. لقيت الاتوبيس وقف جمبي في الاشارة وكانت الناس مدلدلة منه كدة شوية وكدة شوية وناس باظين مش بصين.. هناك فرق بين البص والبظ... لان البظ دة جاية من فعل مبظوظ

عارفين معجون الأسنان.. لما بندوس عليه وينفعص كدة.. ويطلع بتاعه كدة على سنان فرشه السنان.. هى دي بقى البظه من فعل بظ بظا مبظوظا.. حاجة تركيبة كدة في اللغة.. المهم الاشارة طولت وعربيتي المكيفة الكوبية.. بدأت تشمئز من المنظر الفظيع دة ياى ايه دة ايه الناس دي كلها معكوله كل دول معندهمش عربيات

شعب فقير صحيح.. ازاى الناس دي قادرة تعيش من غير عربيات كوبية وقادرين يعيشوا في شقق مساحتها لا تتعدى ال 63 متر وعايشين بمرتبات تحت خط الفقر بحوالي 45 نقطة ومش قادرين يعلموا ولا ولادهم ولا يثقفوا أنفسهم ولا حتى لاقيين القوت اليومي الصحي

تصوري يا سوزي أن في ناس في البلد الياى دي بيعانوا من أن معندهمش فلوس يجيبوا بيها الدوا.. اه والله تصوري يا حسحسه.. أن الدنيا بتبقى برد عليهم ومبيقدروش يتغطوا.. أنتى عارفه يا جوجو.. أن في ناس في البلد دي بتموت من الجوع والبرد والقهر والظلم والفساد.. دة مجتمع غريب تصوري أني شوفت دة كله وانا واقف في الإشارة.. تصدقوا يا جماعة كل دة واضح عليهم بمجرد أنك تبصلهم.. من غير ما تتكلم مع حد فيهم أو حتى من غير ما هما يصرخوا.. الغريبة أن الناس دي ولا بتتكلم ولا بتصرخ ساكتين.. ايوة ساكتين خالص ساكتين لدرجة أنهم وصلوا لحالة خرس مذمن.. الاشارة اخضرت اخيرا هخلص من الشكل المشمئز دة