عصر الحريم والمترو بالبرسيم

عصر الحريم والمترو بالبرسيم

وكأنهم يعيشون في كهوفا ولا نراهم.. هن نلتقي بهن في كل مكان يعانون مثلنا تماما.. لا يوجد فارق بيننا.. إلا أنهن طالبن لحقوقهن ونحن لا.. نون النسوة وتاء التأنيث.. الحرملك والحريم والالفاظ تتنوع لتعبر عن الموزز ـ موزة كلمة عربية فصيحة تعني المراة بضه الجسد الجميلة البيضاء

المهم السيد مش عارف مين بتاع قطاع تشغيل مترو الانفاق.. كان لازم يعمل حاجة حفظا لماء الوجه وتتويها لما حدث من حادث شنيع في محطة حلوان ثالث أيام عيد الاضحى المبارك.. وطبعا بما اننا جبنا سيرة الثالث فمن الطبيعي أن نتكلم عن المرحلة الثالثة التي ستربط العتبة بالعباسية.. عموما بالرغم من معارضتي الشديدة للمشاريع الجديدة التي اصبحت تشوه كل معالم الشوارع والميادين التي تربينا فيها وإزالة مواطنين أبرياء بحجة النفع العام.. المهم بلاش الكلام اللي يحرق الدم دة

قرر سيادته نقل عربيتى السيدات من العربة الاولى والثانية لتصبح في منتصف القطار.. يعني شوية العربيات اللي اتربوا عليها وفيها وكان الشباب بيقف عند العربة الاخيرة من الرصيف المواجهة للتظبيط خلاص الايام دي راحت وولت.. دلوقتي بالنسبة للشباب بتاع الفرجة والتظبيط هيلاقي الحريم مواجهين لبعضهم على الرصيفين.. يعني مش هينفع تقف وتظبط.. دي حاجة يعني الكبت هيزيد خد بالك على نفسك

حاجة تانية الرجالة المتوحشين مش واخدين بالهم من أن هذه العربات من اجل الجنس الرقيق الدقيق.. مش الدقيق بتاع الكيكه خليك محترم.. الواحد من دول يركب غلط وكأنه ارتكب فعله شنعاء في تاريخه الانساني.. وفي حق البشرية كلها.. حاجة عجيبة مهو انتوا كنتوا لسه واقفين جمبنا على الرصيف.. المهم برضه أن الموضوع لا يسلم من النزول بعد سماع كلمتين تلاته.. من واحدة يكون ربنا مديها الصحة شوية

تنزل من المترو تلاقي عسكري ظريف كدة.. فهمومه انك مذنب يسحبك من ذراعك دة ان مكانش من قفاك وتدفع الغرامة زى الشاطر لأمين شرطة له مكتب في المحطة لذيذ برضه.. وبعديها تحرم تركب المترو كله تاني خالص

الغرامات دي هتروح فين جهاز مترو الانفاق بيحفر دلوقتي وبيخربق الدنيا.. يعني هو انت مش هتساهم يا اخي متبقاش كدة خليك كدة وبتاع.. الغريب بقى أن عربيات السيدات أصبح ليها زجاج فاميه يعني مانع للرؤية من الخارج شئ لذيذ والله.. ويثير عدد من الاستفسارات.. المحرجة والمخجلة ان لم تكن بداخلنا جميعا فهى بداخلي انا وحدي ليه الزجاج مانع للرؤية من الخارج.. مجرد سؤال؟.. ممكن كمان سؤال.. هو ليه جهاز تشغيل المترو كتب كلمة سيدات على الرصيف مش عيب اننا ندوس عليهم.. سؤال تاني بس مش مجرد.. هو ليه جهاز تشغيل المترو يوجد في اسمه كلمة تشغيل هو اون وأوف.. وله ايه بالظبط


على فكرة الموضوع أتأخرت كتابته عشان كنت عايز اصور المترو