اخواني واعزائي.. لولا الغلاوة والملامة ما كنت طلبت منكم طلبا مثل هذا.. هو في احلي من انك تقف جمب أخوك الانسان المحتاج طبعا مفيش وانا عارف اني لو طلبت الطلب دة من حد غريب يمكن يكون رد فعله غريب شوية على اساس ان العلاقة بينا لا تسمح باني أطلب منه حاجة زي كدة.. وانا متأكد ان كل واحد فيكم محوش له قرشين تحت البلاطة.. ربنا يزيدكم انا مليش دعوة بدخلياتكم.
بما ان عيب اني أطلب حاجة من حد غريب عليا وانتوا موجودين عشان كدة اتشجعت جدا وكمان يعني هو مش انا الوحيد المزنوق دة العالم كله بيعاني من أزمة مالية وفضيحة على الاخر مصانع كبيرة في العالم بتسرح عماله ومصانع تانية بتفلي العماله.. سيبونا من الشعر والتفليه وخلونا في الموضوع بتاعي هو دة الاهم بالنسبة ليا في الوقت الراهن
الموضوع وبكل اختصار.. أن من حوالي شهر كنت رايح أقابل ناس اصدقاء عزاز جدا عليا كانوا ماسكين شغل في معرض فورمولا اللي كان في قاعة المؤتمرات وطبعا مخبيش عليكم اني دخلت سفلقة.. مهو يعني مش من المنطقي اني ادفع 25 جنية عشان ادخل واتفرج على شوية عربيات لما بشوفها في الشارع بحس ان هيجيلي شلل أطفال.. المهم اني دخلت وقابلت اصحابي وقعدنا شوية سوا وبعدين لفيت شوية في المعرض بصراحة معجبنيش غير شوية عربيات قديمة كانوا عرضينها كمنظر بس.. عينات للعرض فقط.. غير ان مرسيدس كانت عارضه دراجات.. بس الصراحة شكلهم تحفه.. فيهم واحدة سعرها 15 ألف جنية والتانية 18 ألف جنية أيوة والله الأسعار دي حقيقية وروحوا أسالوا عليها في معارض مرسيدس.
المهم مش هطول قولوا طول يا عيال.. الدور الفوقاني كان فيه شوية عربيات 4×4 عجبتني في البداية الاند روفر شوية قعدت اتفرج على الكيا والسوزوكي والحاجات التعبانة دي حتي وصلت إلى البارتيشن بتاع تويوتا المهم كانوا حاطين اللاند كروزر حبيبتي بتاعه 2009 العربية دي سبحان الله طول عمري بحبها معرفش ليه.. انتوا عارفين لما تشوفوا واحدة حلوة كدة.. وتتشدوا ليها تلاقي في كهربا كدة للموضوع.. المهم وقفت واتنكت على الاخر بقي يله هو ولا فرجه ولا شراء.. وفضلت اسأل عن تفاصيل اللي جاب أم العربية والحاجات الجديدة اللي فيها ومن ضمنها كان أن التلاجة بتاعتها كبروها وخلوها تشيل 6 زجاجات مياه من اللي هي بجنية ونص دي يعني التلاجة بس عشان تملاها يعني تدخلك في بتاع 10 جنية أو يمكن خمسين طبعا مفيش مانع أنك تحط لك شيكولاتين وله شوية بسكويت بالشوكلاتة.. سالته على سعرها واللذيذ اني متخضيتش لان كان سعرها مليون و300 ألف جنية سالته عن شوية حاجات تانية بصراحة كان معايا واحد صديق عزيز بقي واقف مذهول من اللي انا بعمله لاني سألت في شوية تفاصيل عن العربية أقنعته وأقنعت مندوب الشركة أني هشتري.
من كام يوم دخلت على موقع سوني الناس اللي قريبة مني عارفه أني بحب التصوير الفوتوغرافي المهم لاقيت كاميرا لسه نازله في شهر يناير الفائت.. هي ولامؤخذة 24.6 ميجا بيكسل.. بلاش حد يقل أدبه همه عملوها كدة عندكم مانع خلاص محدش يشتري.. الكاميرات البروفيشينل على فكرة بتتباع من غير العدسات بتاعتها يعني من الاخر الكاميرا دي ممكن انها بكل اكسسواتها وكل الحبشتكنات التانية ممكن سعرها يعدي الـ 25 ألف جنية مصري دة بالميت
محدش ياخد كلامي في المدونة دي عن أنه دعاية للشركتين السابق ذكرهم.. المهم اني في احتياج شديد اللهجة.. شديد الحاجة مش اللهجة.. لحوالي 20 مليون جنية واللي هيسلفهم لي هديله كشف حساب مفصل بالتالي شراء السيارة اللاند كروزر اللي احنا اتفقنا اني بحبها والكاميرا السوني A900 اللي هي 24.6 ميجا بيكسل.. بجميع مشتملاتها.. اللي انا برضه بحبها وهجيب عيش فينو من الفرنساوي الطويل دة ابو سمسم.. وعلبه جبنه نيستو من اللي هي 24 قطعة الكبيرة دي و500 جرام زتون كلاتاته.. وشقة واسعة بقي عشان انا عايش ايجار جديد يله بقي خلينا نتبشرق.. وكيلو ونص تفاح من الاحمر ابو 10 جنية دة ابو قشرة طخينة دة اللي بيترمي ربعه بعد التقشير والتنضيف.. وبتاع مثلا 30 او 40 واحدة كيوي الاختراع الجديد.. صحيح حد يعرف ليه او اشمعنا بيتباع بالواحدة لو حد يعرف والنبي يقولي.. وهجيب كمان عجلة دراجة مرسيدس للواد نور مهو يعني ميصحش ابقي راكب انا لاند كروزر والواد يبقي راكب عجلة من عند ابو الجوخ.. مش منظر خالص.. واجيب شوية هدوم مثلا يجي ببتاع قميصين وشوية بنطلونات شياكة بقي.. واطلع رحلة سفاري انا والواد نور والبسه بنطلون بجي وتي شيرت بولو.. طبعا في ناس حشرية هتقولي طب وأم نور مش هتجيب لها حاجة هرد واقول ان الفلوس هتكون معاها كالمعتاد.. وياريت مفيش حد يعملي السبع رجالة ويقولي مش عارف ايه كلنا بنعمل كدة بس هة.
المبلغ مقبول كتحويل بنكي او شيك ولو عندكم ذوق هيكون كاش عشان البنوك بتقفل جمعة وسبت وانا معنديش اجازات في وسط الاسبوع.. وهنيالك يا فاعل الخير والثواب.. اللهي يطعمكم ما يحرمكم
